“Mensig, maar troukoek is duur,” was my woorde so vier jaar gelede. Die eindproduk was egter elke rand werd en ons het dit met ’n breë glimlag betaal.
‘n Vriendin het hierdie jaar Januarie dieselfde gesê en met hul begroting bietjie knap, het ek aangebied om die koek te bak en dit boonop as trougeskenk te doen. Ek is immers nie te sleg met bak nie en geniet ‘n uitdaging. Hoeveel moeite kan dit dan nou wees? ‘n Wit koek met naakte versiersel en ‘n paar vetplantjies om dit af te rond klink maklik genoeg. Maar wie soek dan nou gewone vanielje koek, ons maak dit ’n kombinasie van lemoen en sjokolade-koffie lagies. Heerlik!
Ek haal vandag my hoed af vir elke bakker/bakster wat koek bak vir ‘n lewe. Hetsy dit troukoek, verjaardagkoek, ooievaarstee koek of wat-die-okasie-ook-mag-wees-koek is. Dit is WERK. Vandag verstaan ek hoekom daardie perfekte koeke so baie kos en het ek baie meer waardering vir daardie stukkie hemel wat jy en jou geliefdes deel.
So voor jy volgende keer jou kleintongetjie wil insluk, dink bietjie aan hoeveel ure se werk daardie persoon moet insit vir iets wat deel van jou mooiste herinneringe gaan word … en geniet daardie happies ten volle.
Ciska Olivier - In die gedagtes van 'n skrywer 