Los gedagtes

My gedagtes is ‘n warboel deurmekaar flentertjies. Ek sit dikwels en dink lank en diep oor dinge. Die afgelope tyd is dit net asof niks konkreets in my gedagtegang kom vassit nie. Miskien is dit al die verandering. Miskien wil ek nie nou te diep oor dinge dink nie. Miskien moet ek tot stilstand kom en ‘n slag net weer hoor wat alles in my kop aangaan.

Ek is besig om ‘n tuinhoekie te beplan. My man bou bokse en plant blommetjies, want ek soek ‘n hoekie waarheen ek kan wegbreek en waar ek my siel kan voed. ‘n Hoekie waar ek kan sit en lees of skryf. Waar ek sommer net kan sit en na die voëltjies luister terwyl ek ‘n beker koffie geniet. Ek smag al lank na so hoekie.

Miskien is dit presies wat ek nodig het om weer sin te maak van die warboel in my kop. ‘n Hoekie om my eie te noem. Ingerig soos ek daarvan hou.

Die laaste twee jaar was ons swerwers. Altyd inwoners van iemand anders se huis. Dis tyd om my stempel op my omgewing af te druk en weer tuis te voel in my eie omgewing.

Ek dink die tuinhoekie is die perfekte plek om te begin.

Die tyd is nou

Sjoe. 2020 het sowaar vreemde draaie met ons geloop. En hier is ons op die vooraand van Kersfees.

Ek is skuldig daaraan dat ek nie baie gedeel het in die afgelope paar maande nie. Dit ná ek redelik gereeld my gedagtes met julle gedeel het. Dit voel egter asof so saam met die inperking, het my gedagtes ook ingeperk geword. Woorde kom die jaar nie maklik nie. Ek is nie seker daar is regtig woorde om hierdie jaar te beskryf nie. Vir ons elkeen was daar ander uitdagings. Vir sommiges vooruitgang. Vir ander slegs uitgawes. Meeste van ons is in ’n nuwe rigting ingestoot. Of ons daar wou wees of nie.

Tog is ek dankbaar. Baie, baie dankbaar. Dit gaan goed met ons. Ek, my man en ons onlangs aangenome kat. Ek hoop jy is ook dankbaar. Daar is altyd uitdagings. Hierdie jaar het heelwat meer gehad, ja, maar deur God se genade het ons ’n dak oor ons kop, kos op ons tafel en ’n warm bed waarin ons slaap. Ons kan nog op ons eie aangaan. Dit is voorwaar iets om voor DANKBAAR te wees.

Ek dink ons moet ons uitkyk verander. Eerder as uitsien na 2021 en hoe dit beter gaan wees, kom ons verander ons uitkyk nou al. Hier. Vandag. Nóú. Die mag is in ons hande. Eerder as wag vir môre, kom ons maak nou ’n bewustelike besluit om die res van hierdie dag beter te maak.

Dis hoekom dit immers in Engels as “present” bekend staan. En die tyd kan nie beter as om die geskenk van hierdie geleende tyd op aarde te besef as juis nou nie.

Aan jou en jou geliefdes wens ek ’n geseënde Kersfees toe.